سوگنامه ای برای داغ هایی که کوردها به جان میخرند سروده معین شاهویسی شاعر درد آشنای کورد
ئاسمان کوردەواری داخێ تر هەم گرتەوەر
لەرزە لەرزێ گیانەگەێ چؤ زلزلەێ بەم گرتەوەر
گرتەوەر رووژێ ک خەو ماوا نەکردە ماڵمان
ماڵ رمیاێ هیچکەسێ دی جا نەکردە ماڵمان
رووڵەگان بێ دەس و پاێ قنجە قنجە که‌فتیێ
لەرز و دڵچرچەی ئەزیز بێ زوانا خەفتیێ
عومرێگە بیدەسڵات و پڕلە ژانێ ک خەمە
خەوزڕ رینؤسەگە و فێر زوانێ ک خەمە
لەێره تەم تووڕ سیەێ کیشاسه ئاسمان شار
ها لە دەفتەر پەژاره شعر بێ نیشان شار
جور پا و دەس روولەیلێ ک گوم کریاێە دی
هەرچێ کار و کەس روولەیلێ ک گوم کریاێه دی
واێ زەلانێ تیەێدنە خوەێ بافە بافه هەلکەنێ
زڵف شیویاێ داڵگەیلمان کڵافە هەڵکەنێ
ئیمە کورد لە دڵەو کوشیاێ ساڵەیل سیە
گەرمەشین ماڵەگان کوردەماڵانە عەزیز
ئێ ولاتێ ک غەریب مانگ و ساڵانە عەزیز
رووژێ لە دەس پەژارەێ داوڵەیل بێ دەنگا
چؤ تناف گیس شووڕ دەس لەیل بێ دەنگا
رووژی داخ دارەگانەو سووزمان زڵف دڵ
پشت دیوار و خەزانەێ دەروەچەیل قڵف دڵ
رووژێ خانەقین لە دەس دؤر لە ماوای قین کەێ
دالگێ لەێ ناو شەوارە وە لەشێیا شین کەێ
ئاخ و داخ سەرزەمینم هەرچێگە کەس خەێدە لا
رووژێ ک ئنفاڵ م لە فاڵ خوەێ دەس خەێده لا
دیدەگان ئەسری و نؤقانن چەوەیلمان
یەێ ژیان بێ وڵاتیگ دؤر لە هەرچێ مەیلمان
جوور نەخش پاێ پەتیێ ک وە رؤ ئەو سەیله مەن
جوور سەروینێ ک وە لارەو لە لاوارەیله من
رووژێ کؤیەسان فەرهاێ رووژێ کووبانی من و
زام تێخ و زام ئاسن دانە نیشانی من و
رووژێ تووژ ئاخرەیل زەخم کاری کوولبەرێ
سام سەرد کؤیەگان و داخداری کوولبەرێ
رووژێ وەفرێ ک بڵووزە کەێ وە گیان کوردەگان
رووڵە رووڵە رووڵە روو زکر زوان کوردەگان
شین گەرم داڵگ کوڕ مردیێ ئەژنەفتمە
تاو لاوار وە جەرگا بردیێ ئەژنەفتمە
کؤچە کؤچە جادە جادە شوون لوور رووڵەگان
ویڵ و وەیلان هەڵەپچە و سەرسنووڕ رووڵەگان
لێو وشک و گوپ زەخم و دەرد کاری ها دڵم
ئاسمانێ ک وە پیمانا نەواری ها دڵم
داخداری کوردەگانە وەختێ ک زەؤ هاتە دەنگ
راێ وڵاتە هەرچێ ک بەندەێ خودا نەؤ هاتە دەنگ
بێستؤن فەرسەنگەیل هەرچێ دیوار سەرم
گوم بؤیە لە ئێ وڵاتە سەروەن لار سەرم
گوم بؤیە پا و دەس رووڵەیل بێ تەخسیرێ ک
ئاسمان چاوێان دیرێ وە داخا گیرێ ک
رووژێ ک دی تووز خەم باێدن لە گیانمان بوەێ
بار کوولەێ ساڵیار خەم لە شانمان بوەێ
رووژێ ئاگر رووژێ سەرما رووژێ سەر
گیر بؤدە ژێر ئێ لاواره لە ناو قاپ دەر
زانیدن روولەیلێ ک ئێجورە چینە چؤ بؤیە
ماڵ هاوساێ ک لە ناوێ گەرمەشینە چؤ بؤیە
چووڕە چووڕە چووڕیان یە دەم تیەڵ خؤنییە
چاوەگان پڕلە ئەسر شار سەرپیەڵ خؤنییه
لاوە لاوە ساتەگانێ ک وە لاوە لا کوتێ
جوور روولەێ ناوزگ دایەێ ک دیرێ پاکوتێ
چرچ و لەرزەێ سەر وە قەێ موهر وڵاتە وە خودا
سەر لە لیم شیوانێه ئێ کارساتە وە خودا
داخ کوردەیلێ ک هە رووژێ وە یەێ ژان گیر تیەن
جوور شیشەێ ک وە سام دەم یەێ سان گیر تیەن
موور و شینە تاق چووڵ تیرچوو باوانییم
من وە داخەو ناسنەم ک کورد کوردستانییم
